पुणे : राज्यातील मुलींच्या फी माफी योजनेच्या प्रभावी अंमलबजावणीसाठी उच्च व तंत्रशिक्षणमंत्री चंद्रकांत पाटील ‘ॲक्शन मोड’मध्ये आले आहेत. शुक्रवारी (दि. १४) त्यांनी गरवारे महाविद्यालयाला अचानक भेट देऊन फी माफी निर्णयाच्या अंमलबजावणीचा आढावा घेतला. यावेळी त्यांनी महाविद्यालयांना मुलींच्या समस्या सोडवण्यासाठी विशेष समित्या स्थापन करण्याच्या सूचना दिल्या.
मुलींच्या उच्चशिक्षणासाठी महत्त्वपूर्ण निर्णय
राज्यातील मुलींचे उच्चशिक्षणाचे प्रमाण वाढावे, यासाठी व्यावसायिक आणि वैद्यकीय शिक्षणाचे शुल्क माफ करण्याचा निर्णय राज्य सरकारने घेतला आहे. यासाठी ८४२ अभ्यासक्रमांसाठी दोन हजार कोटी रुपयांची तरतूद अर्थसंकल्पात करण्यात आली आहे. याच निर्णयाची प्रभावी अंमलबजावणी होत आहे का, हे तपासण्यासाठी उच्च व तंत्रशिक्षण संचालनालयाने भरारी पथक नेमले आहे.
मुलींनी ३१ मार्चपूर्वी अर्ज करावा – चंद्रकांत पाटील
या योजनेचा लाभ मुलींना वेळेत मिळावा यासाठी ३१ मार्चपूर्वी आवश्यक कागदपत्रांसह अर्ज करावा, असे आवाहन चंद्रकांत पाटील यांनी केले. फी माफीच्या अंमलबजावणीबाबत मुलींना कोणत्याही अडचणी येऊ नयेत, यासाठी प्रत्येक महाविद्यालयाने विद्यार्थिनी आणि महाविद्यालय प्रशासन यांची संयुक्त समिती स्थापन करावी, असे निर्देश त्यांनी दिले.
१०० महाविद्यालयांना अचानक भेटी देणार
फी माफी योजनेचा अंमल किती प्रभावी आहे, याचा आढावा घेण्यासाठी राज्यभरातील १०० महाविद्यालयांना अचानक भेट देण्याचा निर्णय पाटील यांनी घेतला आहे. यावेळी काही विद्यार्थ्यांनी ‘कमवा आणि शिका’ योजनेतील भत्ता वाढवण्याची मागणी केली. त्यावर मंत्री पाटील यांनी यासंदर्भात सकारात्मक निर्णय घेण्याचे आश्वासन दिले.
राज्यातील विद्यार्थिनींसाठी महत्त्वाचे पाऊल
राज्य शासनाच्या या योजनेमुळे उच्च शिक्षणासाठी आर्थिक अडचणी असलेल्या विद्यार्थिनींना मोठा दिलासा मिळणार आहे. तसेच, महाविद्यालयांमध्ये विद्यार्थिनींसाठी विशेष समित्या स्थापन केल्याने त्यांच्या अडचणींवर त्वरित तोडगा निघण्यास मदत होणार आहे.